நீங்கள் தேடியது "விவசாயிகள் சாலை மறியல்"

திருவாரூர்:

திருவாரூர் அருகே மாங்குடி, திருநெய்ப்பேர், குன்னியூர், வடகரை ,ஆத்தூர், கூடூர், கல்யாணமகாதேவி, புதுப்பத்தூர் உள்ளிட்ட பல்வேறு கிராமங்களில் ஆயிரக்கணக்கான சம்பா பயிர்கள் தண்ணீரின்றி கருகி வருகிறது. இதனால் விவசாயிகள் பாண்டவையாற்றில் தண்ணீர் விட்டு பயிர்களை காப்பாற்ற பொதுப்பணித்துறை மற்றும் மாவட்ட நிர்வாகத்திடம் முறையிட்டனர். ஆனால் எந்த பயனும் விவசாயிகளுக்கு கிடைக்க வில்லை.

இதனையடுத்து திருவாரூர் அருகே மாங்குடி பாண்டவையாறு பாலத்தின் அருகே அனைத்து கட்சியை சேர்ந்த விவசாயிகள் நேற்று திடீர் சாலை மறியல் போராட்டத்தில் ஈடுபட்டனர். போராட்டத்தின் போது பாண்டவையாற்றில் முறை வைக்காமல் தண்ணீர் விட வேண்டும் என வலியுறுத்தியும், தண்ணீர் முறையாக வழங்காத தமிழக அரசை கண்டித்தும் முழக்கங்களை எழுப்பினர்.

மறியல் போராட்டம் காரணமாக ஒரு மணி நேரத்திற்கு மேலாக திருவாரூர் - திருத்துறைப்பூண்டி சாலையில் போக்குவரத்து பாதிக்கப்பட்டது.

இதுபற்றி தகவல் கிடைத்ததும் பொதுப்பணித்துறையினர் மற்றும் போலீசார் சம்பவ இடத்திற்கு விரைந்து சென்று போராட்டத்தில் ஈடுபட்டவர்களிடம் பேச்சுவார்த்தை நடத்தி உடனடியாக தண்ணீர் வழங்கிட நடவடிக்கை எடுக்கப்படும் என உறுதியளித்தனர் அதன் பேரில் சாலை மறியல் போராட்டம் கைவிடப்பட்டது.

பேராவூரணி:

மேட்டூர் அணையிலிருந்து கடந்த மாதம் திறக்கப்பட்ட நீர் கல்லணைக்கு வந்து சேர்ந்தது.22-ந் தேதி கல்லணையிலிருந்து திறக்கப்பட்ட நீர் இதுவரை பேராவூரணி கடைமடைப் பகுதிக்கு வரவில்லை. ஒருபக்கம் காவிரி நீர் கடலில் கலக்கிறது. ஒரு பக்கம் ஏரி குளங்கள் காய்ந்து கிடக்கிறது. பேராவூரணி, சேதுபாவா சத்திரம் ஒன்றியங்களில் காவிரி நீர் வரத்து இல்லாமல் வயல் வெளிகள் காய்ந்து கிடக்கிறது. வாய்க்கால்கள் தூர்வாரப் படாமலும், உரிய பராமரிப்பு இல்லாததால் காவிரி தண்ணீர் கடை மடைப் பகுதிக்கு எட்டாக் கனியாக உள்ளது.

இதனை கண்டித்து பேராவூரணி, சேதுபாவா சத்திரம் ஒன்றியங்களைச் சேர்ந்த கடைமடைப் பாசன விவசாயிகள் கூட்டமைப்பினர் தமிழ்நாடு அரசின் மெத்தனப் போக்கைக் கண்டித்தும், முறை வைக்காமல் தொடர்ந்து தண்ணீர் விடக்கோரியும் சாலை மறியல் போராட்டம் நடத்தினர். முன்னதாக பெரியார் சிலையில் இருந்து ஊர்வலமாகச் சென்று பொதுப்பணித்துறை அலுவலகம் முன்பாக சாலை மறியல் போராட்டத்தில் ஈடுபட்டனர்.

அங்கு வந்த தாசில்தார், பொதுப்பணித் துறை அலுவலர்கள் விவசாயிகளிடம் பேச்சு வார்த்தையில் ஈடுபட்டனர். உடன்பாடு ஏற்படாத நிலையில் தொடர்ந்து சாலை மறியலில் ஈடுபட்ட வக்கீல் கருப்பையா,வேலுச்சாமி, நீலமோகன் உள்ளிட்ட விவசாயிகளை போலீசார் கைது செய்தனர்.